អភិបាលរាជធានីជំរុញឱ្យអាជ្ញាធរខណ្ឌទាំង ១៤ ពន្លឿនការងាររំដោះទឹក ស្ដារប្រឡាយលូ និងបន្តបង្ក្រាបគ្រឿងញៀន-ឆបោកតាមអ៊ីនធឺណិត

ភ្នំពេញ៖ ឯកឧត្តម ឃួង ស្រេង ប្រធានគណៈបញ្ជាការឯកភាពរាជធានីភ្នំពេញ បានចេញបទបញ្ជាដ៏ម៉ឺងម៉ាត់មួយ ទៅកាន់កម្លាំងមានសមត្ថកិច្ច និងអាជ្ញាធរខណ្ឌទាំង ១៤ ឱ្យបន្តយកចិត្តទុកដាក់ខ្ពស់លើការងារសំខាន់ៗចំនួនបី គឺការ ទប់ស្កាត់ និងបង្ក្រាបគ្រឿងញៀន ការ ប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ONLINE

ការណែនាំនេះ បានធ្វើឡើងនាព្រឹកថ្ងៃទី ៧ ខែតុលា ឆ្នាំ២០២៥ ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នៅសាលារាជធានី។

១. អាទិភាពខ្ពស់លើការរំដោះទឹកជំនន់ទឹកភ្លៀង

លោក ឃួង ស្រេង បានលើកឡើងថា ដោយសារឥទ្ធិពលនៃគ្រោះធម្មជាតិ រួមទាំង ជំនន់ទឹកភ្លៀង ដែលបានយាយីដល់រាជធានីភ្នំពេញ លោកបានណែនាំឱ្យអាជ្ញាធរខណ្ឌទាំង ១៤ ត្រូវយកចិត្តទុកដាក់ជាពិសេស ក្នុងការ ជំរុញការអនុវត្តការងាររំដោះទឹក ចេញពីមូលដ្ឋានប្រជាពលរដ្ឋឱ្យបានលឿន និងមានប្រសិទ្ធភាពខ្ពស់។

លោកអភិបាល ក៏បានណែនាំបន្ថែមឱ្យអាជ្ញាធរ និងមន្ត្រីជំនាញអនុវត្តការងារជាប្រចាំដូចខាងក្រោម៖

• ចុះពិនិត្យ និងស្ដារប្រឡាយលូ ក្នុងភូមិសាស្ត្ររបស់ខ្លួននៅរដូវប្រាំង។
• ណែនាំប្រជាពលរដ្ឋកុំឱ្យបោះសំរាមចូលលូ ដើម្បីជៀសវាងការស្ទះ។
• សហការជាមួយមន្ទីរសាធារណការ ចុះត្រួតពិនិត្យ និងកាយបើកមុខទឹកនៅពេលមានការស្ទះ។
• មន្ត្រីជំនាញត្រូវចុះពិនិត្យ ផ្លូវ គំនូសចរាចរណ៍ និង ស្លាកសញ្ញាចរាចរណ៍ ដែលខូច ឬបាក់បែក ហើយរាយការណ៍មកសាលារាជធានីភ្លាមៗ។

២. បន្តបង្ក្រាប ONLINE SCAMS និងគ្រឿងញៀនឱ្យដល់ឫសគល់

លោក ឃួង ស្រេង បានបញ្ជាក់ថា គណៈបញ្ជាការឯកភាពរាជធានីភ្នំពេញ មិនមែនធ្វើការងារតែលើសន្តិសុខទេ គឺធ្វើការគ្រប់ជំពូកដើម្បីផលប្រយោជន៍ប្រជាពលរដ្ឋ។ លោកបានដាក់បទបញ្ជាដល់កម្លាំងមានសមត្ថកិច្ចឱ្យបន្តការងារបង្ក្រាបបទល្មើសធំៗ៖

• ការឆបោកតាមប្រព័ន្ធបច្ចេកវិទ្យា (ONLINE SCAMS): លោកបានចាត់ទុកការងារនេះជារឿងសំខាន់ដែលរាជរដ្ឋាភិបាលកំពុងយកចិត្តទុកដាក់។ លោកបញ្ជាក់ថា កម្លាំងសមត្ថកិច្ចបានបង្ក្រាបបទល្មើសនេះបានប្រមាណ ៨០% ហើយ ប៉ុន្តែទោះបីជាយ៉ាងណាក្ដី ត្រូវបន្តការចុះពិនិត្យនៅតាម បុរី និងខុនដូ ដែលមានការសង្ស័យ និងត្រូវចុះបង្ក្រាបភ្លាមៗ ប្រកបដោយវិជ្ជាជីវៈខ្ពស់ និងភាពច្បាស់លាស់។
• បញ្ហាគ្រឿងញៀន៖ លោកបានចាត់ទុកគ្រឿងញៀនជា បញ្ហាដ៏ធំ ដែលបាននិងកំពុងចាក់គ្រឹះក្នុងមូលដ្ឋាន។ លោកបានស្នើឱ្យ កងរាជអាវុធហត្ថ និង នគរបាល ត្រូវសហការគ្នាល្អ ដើម្បីរួមគ្នាលុបបំបាត់គ្រឿងញៀនឱ្យមានប្រសិទ្ធភាពខ្ពស់។ ក្រៅពីនេះ លោកក៏បានស្នើសុំឱ្យ មន្ទីរប្រឆាំងបទល្មើសគ្រឿងញៀន នៃក្រសួងមហាផ្ទៃ សហការល្អជាមួយ ស្នងការដ្ឋាននគរបាលរាជធានីភ្នំពេញ ពេលចុះបង្ក្រាប។

តាមរយៈកិច្ចប្រជុំនេះ លោក ឃួង ស្រេង បានសង្កត់ធ្ងន់ពីតួនាទីរបស់អាជ្ញាធរ និងកងកម្លាំងក្នុងការធានាទាំង សន្តិសុខ សុវត្ថិភាព និង សុខុមាលភាព របស់ប្រជាពលរដ្ឋក្នុងរាជធានីភ្នំពេញ៕